August 3, 2023
ጉባዔው በ 86 ጉዳዮች ላይ ተወያይቶ ውሳኔ አሳለፈ
August 7, 2023
Show all

ጉባዔው በተጠናቀቀው በጀት ዓመት ከቀረቡለት 847 አቤቱታዎች 793ቱ ሕገ መንግሥት መብት ጥሰት እንደሌለባቸው ገለፀ

  • አምስት መዝገቦችን ለመጨረሻ ውሳኔ ወደ ለፌደሬሽን ምክር ቤት ልኳል

መክሊት ወንድወሰን

አዲስ አበባ ፡- የኢ.ፌ.ዴ.ሪ ሕገ መንግሥት ጉዳዮች አጣሪ ጉባዔ በአምስት ወራት ውስጥ 847 የአቤቱታ መዝገቦችን መርምሮ 793 መዝገቦች ሕገ መንግሥታዊ የመብት ጥሰት እንደሌለባቸው ገለጸ፡፡  አምስት መዝገቦች ላይ የሕገ መንግሥታዊ መብት ጥሰት ስላገኘባቸው ለመጨረሻ ውሳኔ ወደ ፌደሬሽን ምክር ቤት መላኩንም አስታውቋል፡፡

የጉባዔው ጽሕፈት ቤት ኃላፊ አቶ ደሳለኝ ወዬሳ ለኢትዮጵያ ፕሬስ ድርጅት እንደተናገሩት፣ በ2015 የበጀት ዓመት የጉባዔው አዲስ አባላት ሹመት በመዘግየቱ ለስድስት ወራት የአቤቱታ መዝገቦችን አልተመለከተም ነበር፡፡ የጉባዔው አባላት ሹመት ከተከናወነበት የካቲት 1 ቀን 2015 ዓ.ም ጀምሮ ባከናወነው የማጣራት ሥራ  በአምስት ወራት ውስጥ 847 መዝገቦችን መርምሯል፡፡ በዚህም በ793 መዝገቦች ምንም ጥሰት ያልተፈፀመባቸውና አንዳንዶቹም ከጉባዔው ሥልጣንና ተግባር ጋር የማይሄዱ መሆናቸውን አረጋግጧል፡፡

 እንደ አቶ ደሳለኝ አባባል፣ ከ793 የአቤቱታ መዝገቦች መካከል አብዛኛዎቹ በፍርድ ቤት ማለቅ የነበረባቸው ጉዳዮቸው ለጉባዔ መጥተዋል፡፡ ይህም ሊሆን የቻለው የአቤቱታ አቅራቢዎች የግንዛቤ እጥረት ማለትም ጉባዔውን እንደ ሰበር ሰሚ የመመልከት ችግር መሆኑ ነው ብለዋል፡፡ የተወሰኑ መዝገቦች ደግሞ ምንም ዓይነት የሕገ መንግሥት መብት ጥሰት ያልተገኘባቸው ናቸው፡፡

 በሌላ በኩል ጉባዔው ባደረገው የምርመራ ሥራ አምስት አቤቱታዎች ላይ የሕገ መንግሥታዊ መብት ጥሰት ስላገኘባቸው የመጨረሻ ውሳኔ ውሳኔ እንዲያገኙ  ወደ ፌደሬሽን ምክር ቤት የውሳኔ ሃሳቡን መላኩን አስረድተዋል፡፡ ሕገ መንግሥታዊ መብት ከተጣሰባቸው አምስት ጉዳዮች ውስጥ የሴቶች የንብረት ማፍራት መብት፤ የአርሶ አደሮች ከእርሻ መሬት መፈናቀል እና የህጻናት ወላጆቻቸውን የማወቅ መብት የሚሉት እንደሚገኙበት ተናግረዋል፡፡

ጉባዔው በአምስት ወራት ጊዜ ውስጥ ከመረመራቸው አቤቱታዎች ውስጥ የተቀሩት መዝገቦችም  ተጨማሪ ማጣራት ስለሚያስፈልጋቸው  በጉባዔው አባላት አቅጣጫ እንደተቀመጠላቸው አመልክተዋል፡፡ በተጨማሪም በኮቪድ 19 እና የጉባዔ አባላት ሹመት መዘግየት ምክንያት ለረጅም ጊዜ ያልታዩ መዝገቦችን በአጭር ጊዜ ለመመርመር ተጨማሪ ንዑስ ጉባዔ ለማዋቀር መታቀዱን ተናግረዋል፡፡ አያይዘውም ተቋሙ ካለው ሀገራዊ ፋይዳ አንጻር የሚመለከታቸው የመንግሥት ተቋማት ለተቋሙ ተጨማሪ ድጋፍ እንዲያደርጉ ጥሪያቸውን አቅርበዋል፡፡