የሕገ መንገስት ጉዳዮች አጣሪ ጉባኤ ጽ/ቤት ሰራተኞች ፀረ-ፆታዊ ጥቃት ቀንን በማስመልከት ውይይት አካሄዱ
November 28, 2018
የኢትዮጵያ ገቢዎችና ጉምሩክ ባለስልጣን ደንብ ቁጥር 155/2000 አንቀፅ 37 ከሕገ መንግሥቱ አንቀፅ 37/1/ ጋር የሚጋጭ መሆኑ ተገለጸ
February 14, 2019

በሀገር ዓቀፍ ደረጃ የሕገ መንግሥት አተረጓጎም ሥርዓትን ለማጠናከር የሚያስችል የምክክር መድረክ ተካሄደ

????????????????????????????????????

from left to right
Ato million Assefa, W/ro Meaza Ashenafi and Assefa Fisseha (Dr)

 

 

 

የኢ.ፌዴ.ሪ የሕገ መንግሥት ጉዳዮች አጣሪ ጉባዔ የሕገ መንግሥት አተረጓጎም ሥርዓትን ለማጠናከር የሚያስችል ውይይት ከሁሉም ክልል ጠቅላይ ፍ/ቤት ፕሬዚደንቶችና ከምክር ቤት አፈ ጉባዔዎች እንዲሁም ከፌዴሬሽን ም/ቤት አባላት ጋር ቅዳሜ ታህሣስ 20/2011 ዓ.ም በአዲስ አበባ ካፒታል ሆቴል የመሰብሰቢያ አዳራሽ አካሄደ።

የዕለቱ የክብር እንግዳ የሆኑት የኢ.ፌ.ዴ.ሪ ፌዴሬሽን ምክር ቤት አፈ ጉባዔ ክብርት ወ/ሮ ኬሪያ ኢብራሂም በምክክር መድረኩ ላይ በመገኘት መልዕክት ያስተላለፉ ሲሆን፣ በመልዕክታቸውም በሀገራችን የዜጎችን ሰብዓዊና ዴሞክራሲያዊ መብት ለማስጠበቅ በሚደረገው እንቅስቃሴ እየታዩ ካሉ ለውጦች ጎን ለጎን በሀገሪቱ አንዳንድ አካባቢዎች የሚታዩት አለመረጋጋቶች እንደ መንግሥት የሕገ መንግሥትን የበላይነት ከማስከበርና ከማስረጽ አንጻር ብዙ መሠራት እንዳለበት ያመለክታል ሲሉ ተናግረዋል። አያይዘውም የፌዴራልና የክልል የሕገ መንግሥት ተርጓሚ አካላት በምክክር መድረኩ ላይ ልምዳቸውን እርስ በርስ በመካፈል የሕገ መንግሥት አተረጓጎም ሥርዓቱን በማጠናከር፣ ዜጎች በየደረጃው የተቀላጠፈ ፍትህ እንዲያገኙና በሕገ መንግሥት የበላይነት ላይ ዕምነት እንዲያሳድሩ ለማድረግ የበኩላቸውን እንዲወጡ አሳስበዋል።

የሕገ መንግሥት ጉዳዮች አጣሪ ጉባዔ ሰብሳቢና የፌዴራል ጠቅላይ ፍርድ ቤት ፕሬዚደንት ክብርት ወ/ሮ መዓዛ አሸናፊ በበኩላቸው አጣሪ ጉባዔው ሥራውን ከጀመረበት ጊዜ አንስቶ ሕገ መንግሥታዊ ጉዳዮችን ከማጣራት አንጻር በርካታ ሥራዎች መሥራቱን ገልጸው፣ አሁን ሀገራችን ያለችበትን ለውጥ ተከትሎም ሥራውን በተጠናከረ መልኩ በመሥራት ላይ እንደሚገኝ ተናግረዋል። ሀገራችን ያለችበት ጊዜ ተስፋ ሰጪ የለውጥ ወቅት መሆኑን የጠቆሙት ወ/ሮ መዓዛ ተያይዘው የመጡትን ተግዳሮቶች ለማስወገድና የሕግ የበላይነትን ብሎም ፍትህን ለማስፈን በፍትህ ዙሪያ የሚሠሩ አካላት ከመደበኛ ሥራዎቻቸው ባሻገር በግልም በቡድንም ልዩ ኃላፊነት ሊወስዱ እንደሚገባ መልዕክት አስተላልፈዋል።

በመድረኩ ላይም ከአዲስ አበባ ዩኒቨርሲቲ የሕግ ትምህርት ቤት የመጡት ዶክተር አሰፋ ፍሰሀ ስለ ሕገ መንግሥት ባህሪና የአተረጓጎም ሥርዓት ለመድረኩ ተሳታፊዎች የውይይት መነሻ ጽሑፍ አቅርበዋል። ሕገ መንግሥት በባህሪው ሰፊ እንደሆነና በመርህ ላይ የተመሰረቱ ዋና ዋና ጉዳዮችን እንጂ ዝርዝር ጉዳዮችን እንደማያካትት ገልጸው፣ ህይወት የሚዘራበት ተጨባጭ ጉዳዮች ሲመጡ በተርጓሚው አካል እንደሆነ በጽሑፋቸው ገልጸዋል። ሕገ መንግሥት ለረጅም ጊዜ የሚቆይና በየጊዜው ቶሎ ቶሎ የማይቀያየር ቢሆንም ሥርዓቱ በሚፈቅደው መልኩ ኅብረተሰቡ የሚደርስበትን ማኅበራዊ፣ ኢኮኖሚያዊና ነባራዊ የዕድገት ደረጃን በሚመጥን መልኩ ሊሻሻልና ሊያድግ የሚችል መሆኑን ጠቁመዋል።

የሕገ መንግሥት ጉዳዮች አጣሪ ጉባዔ አባል የሆኑት አቶ ሚሊዮን አሰፋ በበኩላቸው በአጣሪ ጉባዔው በተለያየ ወቅት ለትርጉም ወደ ፌዴሬሽን ምክር ቤት የተላኩና ምክር ቤቱም ትርጉም ከሰጠባቸው ጉዳዮች መካከል አስራ ሁለት ጉዳዮችን ለውይይት እንዲሆን ያቀረቡ ሲሆን፣ ተሰብሳቢዎችም አስተያየቶችና ጥያቄዎችን ሰንዝረዋል። በመቀጠልም የሕገ መንግሥት ተርጓሚ አካላትን አደረጃጀት የሚመለከት ፅሁፍ በሕገ መንግሥት አጣሪ ጉባዔ ጽ/ቤት ኃላፊ አቶ ደሳለኝ ወዬሳ ከቀረበ በኋላ በተለይ ከክልል የመጡ ተወካዮች የክልላቸውን የሕገ መንግሥት አተረጓጎም ተሞክሮን ያቀረቡ ሲሆን፣ ብዙዎቹ ግን ገና በመጠናከር ላይ እንዳሉና የፌዴራሉ ሕገ መንግሥት ጉዳዮች አጣሪ ጉባዔ ድጋፍ ሊያደርግላቸው እንደሚገባ ገልጸው፣ ለዚህም በሁሉም ክልሎች ላይ በዚህ ረገድ ጥናት ተደርጎ ወጥነት ባለው መልኩ ክልሎች ሊጠናከሩ ይገባል ሲሉ ተናግረዋል። የዜጎች የሕገ መንግሥት ግንዛቤ እያደገ በመሄድ ላይ በመሆኑ የጥያቄ አቅራቢ ቁጥርም በዛው ልክ እየጨመረ መሆኑንም ተሳታፊዎቹ አክለው ገልጸዋል።

በማጠቃለያም ክብርት ወ/ሮ መአዛ ውይይቱ ገንቢ መሆኑን ጠቅሰው መሰል የውይይት መድረኮች ተቋሞቻችንን አጠናክረን ለመሄድ ስለሚያስፈልጉን በቀጣይም ሊቀጥሉ እንደሚገባና ይህንንም ለማድረግ በየክልሉ በመቀመጥ ሳይሆን ተቀናጅቶ በመሥራት ነው ሲሉ መልዕክታቸውን አስተላልፈዋል።